Fréttasafn

Veltek (Heilbrigðis- og velferðarklasi Norðurlands) og Fjallabyggð sendu inn umsókn í sjóðinn Integrated Health and Care sem var samþykkt. Styrkurinn er að upphæð 3 milljónir og verður hann notaður til að halda tvær vinnustofur, greiða fyrir ferðakostnað á sýningu erlendis og til kaupa á ráðgjöf. Vinnustofurnar munu snúa að samþættingu sú fyrri með hagaðilum og sú síðari með öðrum sveitarfélögum þar sem sérstaklega er horft á yfirfærslugildi verkefnisins.

Það er aftur komið að Fiðringi á Norðurlandi og það hefur tognað töluvert úr honum. Þakið ætlaði að rifna af Tjarnarborg Ólafsfirði í gærkvöldi, stemningin var svo mikil! Það er spennandi að sjá og heyra hvað unga fólkinu okkar liggur á hjarta; hér fá þau tækifæri til að tjá það á skapandi hátt. Tvö kvöld eru eftir og þú getur fengið að fylgjast með. Fiðringslagið verður flutt í dómarahléi á úrslitakvöldinu en í ár kusu nemendur Röddina í klettunum með Gugusar sem mætir á staðinn og skemmtir áhorfendum. Kynnar á úrslitakvöldinu eru Vandræðaskáldin okkar Sesselía Ólafsdóttir og Vihjálmur B. Bragason og Villi kynnir líka á undankeppnunum. 

28 verkefni hljóta styrk úr Framkvæmdasjóði ferðamannastaða 2023 fyrir alls 550 milljónir. Lilja Dögg Alfreðsdóttir menningar- og viðskiptaráðherra tilkynnti um úthlutunina í Vík í Mýrdal í síðustu viku. Veittir voru styrkir til sex verkefna á Norðurlandi eystra.

Northern Lights Fantastic Film Festival óskar eftir ævintýralegum samstarfsaðilum og þátttakendum. Um er að ræða kvikmyndahátíð og stuttmyndakeppni þar sem þemað eru sögur og sýn sem standa utan ramma raunveruleikans.

Siglfirskt vorveður tók á móti fundargestum þegar þeir yfirgáfu Bláa húsið á hádegi í dag, eftir vel heppnað ársþing SSNE. Mjög góð mæting var á þingið í ár af þingfulltrúum, og margir góðir gestir sátu þingið í hluta eða heild, þar með talið ráðherra, þingfólk, formaður stjórnar Sambands íslenskra sveitarfélaga ásamt nýráðnum framkvæmdarstjóra Sambandsins og embættisfólk af svæðinu.

Tillaga þess efnis að hvert aðildasveitarfélag SSNE skipi einn fulltrúa í stjórn samtakanna, nema Akureyrarbær sem skipar tvo, var samþykkt samhljóða á ársþingi SSNE í dag. Aðildarsveitarfélög SSNE eru 10 talsins og hingað til hafa 6 þeirra skipað fulltrúa í stjórn.

Ársþing SSNE fer fram á Siglufirði í dag og á morgun, í Bláa húsinu. Þing SSNE fara með æðsta vald landshlutasamtakanna og er skipað fulltrúum aðildarsveitarfélaganna. Þingum SSNE er ætlað að tryggja lýðræðislega aðkomu allra aðildarsveitarfélaga að málefnum SSNE, vera vettvangur ákvarðanatöku um mikilsháttar málefni þeim og stjórn til leiðbeiningar í veigamiklum málum. Auk hefðbundinna þingstarfa mun innviðaráðherra, Sigurður Ingi Jóhannsson, ávarpa þingið, auk Njáls Trausta Friðbertssonar þingmanns og Heiðu Bjargar Hilmisdóttur formanns stjórnar Sambands íslenskra sveitarfélaga.

Fimm sveitarfélög taka þátt í tilraunaverkefni sem miðar að því að aðstoða íslensk sveitarfélög í þeirri vinnu sem fram undan er við að greina áhrif og afleiðingar loftslagsbreytinga og móta aðgerðir til aðlögunar. Þannig verði sveitarfélögum færðir skýrari ferlar og aðferðir sem gera þeim kleift að búa sig undir möguleg áhrif loftslagsbreytinga á innviði, atvinnugreinar, efnahag og samfélög. Sveitarfélögin sem um ræðir eru Akureyrarbær, Sveitarfélagið Hornafjörður, Fjallabyggð, Reykhólahreppur og Reykjanesbær.

Þann 3. apríl héldu SSNE og Austurbrú málþing á Þórshöfn undir merkjum Eflingar byggðar á Norðausturhorninu - orka - náttúra - ferðaþjónusta, en málþingið var styrkt af Umhverfis-, orku- og loftslagsráðuneytinu. Málþingið var þrískipt eftir málefnum: Norðausturhornið og hringrás ferðamanna um Austur- og Norðurland; Orkumál og atvinnuþróun; og Hagræn tengsl náttúruverndar og byggðaþróunar.

Það er alltaf jafn gleðilegt þegar birta tekur og léttir yfir öllum. Við hjá SSNE höfum lítið látið veður né vinda trufla okkur heldur tókum þátt í því að fanga Norðanáttina á fjárfestahátíð á Siglufirði í vikunni. Það er ekki ofsögum sagt að vel hafi tekist til en uppselt var á hátíðina í ár og voru verkefnin sem þarna voru kynnt hvert öðru glæsilegra. Á bak við hátíðina standa fjölmargir aðilar með EIM í forystu ásamt okkur hjá SSNE og SSNV.