Í vorfór fram morgunfundur Grænna skrefa á Norðurlandi á Múlabergi á Hótel KEA, þar sem starfsfólki sveitarfélaga á sviði umhverfismála og kjörnum fulltrúum var sérstaklega boðið að taka þátt. Mætingin á fundinn fór fram úr vonum, flest mættu á staðinn en einnig var hægt að taka þátt í gegnum Teams. Morgunfundurinn var haldinn af SSNE, SSNV og Svaninum, með aðkomu Sambands íslenskra sveitarfélaga og LOFTUM.

Umhverfis- orku og loftslagsráðherra, Jóhann Páll Jóhannsson ávarpaði fundinn þar sem hann lagði áherslu á þátt sveitarfélaga í að ná markmiðum Íslands í loftslagsmálum og reifaði áherslur ríkisstjórnarinnar í umhverfis- og loftslagsmálum.

Þá tók við kynning frá Norræna Svansmerkinu, þar sem Guðrún Lilja Kristjánsdóttir, framkvæmdastjóri Svansins á Íslandi og Bergþóra Góa Kvaran verkefnastjóri ræddu mikilvægi áreiðanlegra umhverfisvottana í baráttunni gegn grænþvotti og opinberir aðilar geta haft áhrif með innkaupum. Sveitarfélög sem innleiða græn skref í starfsemi sína gera sér innkaupastefnu, þar sem áhersla er lögð á vottaðar vörur og einnig hafa sveitarfélög færi á að setja inn kröfur um umhverfisvottanir við útboðsgerð. Við mannvirkjagerð gegna sveitarfélög lykilhlutverki, þar sem unnt er að setja umhverfiskröfur í skipulags- og byggingvarstigum og veitt fjárlegaslega hvata til umhverfisvænni byggingarframkvæmda með afslætti á lóðagjöldum og/eða gatnagerðargjöldum. Hlutfall umhverfirsvottaðra byggingaframkvæmda er hæst í þeim sveitarfélögum sem hafa farið þessar leiðir í sínu skipulagi. Eins var bent á að sveitarfélög geti fengið eigin framkvæmdir umhverfisvottaðar, svo sem þegar byggja á nýjar skólabyggingar, eða þegar farið er í endurbætur. Svansvottaðar byggingar eru vandaðar og endingargóðar og stuðla þar með að lægri rekstrarkostnaði, viðhaldi og góðri innivist. Bent er á að hafa samband við svanurinn@uos.is fyrir

Ingunn Helga Bjarnadóttir, verkefnastjóri hjá Símey, og Hilmar Valur Gunnarsson, verkefnastjóri hjá Þekkingarneti Þingeyinga, kynntu þá rafrænan skóla LOFTUM sem er fullur af fræðsluefni sem sérstaklega er gert fyrir starfsfólk sveitarfélaga. Í LOFTUM skólanum má m.a. nálgast fræðslu um gerð losunarbókhalds, um græna leiðtogafærni og samgöngumiðað skipulag. Námið er öllum aðgengilegt og ókeypis, en það þarf að skrá sig inn í skólann til að geta horft á námskeiðin. Við hvetjum öll sveitarfélög til að nýta sér þetta góða og gagnlega námsefni. Hér má lesa meira um verkefnið. 

Að lokum flutti Finnur Ricard Andrason, verkefnastjóri hjá Sambandi íslenskra sveitarfélaga kynningu um loftslagsstefnur sveitarfélaga. Farið var yfir lagalegar skyldur sveitarfélaga um að setja sér loftslagsstefnu með tíma- og tölusettum markmiðum um samdrátt í losun frá eigin rekstri og góð ráð gefin um innleiðingu loftslagsmála í starf sveitarfélaga. Mikilvægt er að loftslagsstefna sé skýr, að vandað sé til losunarbókhalds og að aðgerðir séu fjármagnaðar. Öflug stefnumótun í loftslagsmálum sem fylgt er eftir með aðgerðum hefur margvíslegan ávinning í för með sér, m.a. tækifæri til alþjóðlegrar sjóðasóknar, að sveitarfélög verði betur í stakk búin til að takast á við afleiðingar loftslagsbreytinga og hraði innviðauppbyggingu fyrir orkuskipti.

Gestir morgunfundarins tóku að lokum þátt í vinnustofu þar sem fram kom fjöldi góðra hugmynda fyrir sveitarfélög, landshlutasamtök og Samband íslenskra sveitarfélaga um hvernig efla megi umhverfis- og loftslagsstarf sveitarfélaga. Svörin frá þátttakendum fundarins munu nýtast starfsfólki vel í áframhaldandi vinnu með sveitarfélögunum.