Tonik, árleg nýsköpunar- og listahátíð, fór fram í Þórshöfn í Færeyjum nú í byrjun maí, en hátíðin laðaði að sér yfir 700 þátttakendur víðs vegar að – allt frá frumkvöðlum og fjárfestum til listamanna og tæknisérfræðinga. Hátíðin hefur á örfáum árum fest sig í sessi sem mikilvægur vettvangur fyrir nýsköpun, skapandi greinar og tækninýjungar á Norðurlöndum.

Að þessu sinni fór hátíðin fram í SILO, menningar- og nýsköpunarrými í miðbæ Þórshafnar, þar sem fjölbreytt dagskrá bauð upp á fyrirlestra, vinnustofur og listviðburði sem höfðu það að markmiði að örva hugmyndasköpun og efla tengslanet þátttakenda. Hraðið tók einnig þátt í Tonik og kynnti þar HönnunarÞing sem haldið verður á Húsavík næsta haust. 

Mikil tækifæri felast í þátttöku í hátíðum á borð við Tonik fyrir frumkvöðla og fyrirtæki á Norðurlandi eystra. Slíkar samkomur veita aðgang að alþjóðlegum tengslum, nýjum hugmyndum og möguleikum til vaxtar og þróunar. SSNE hvetur áhugasama til að kanna möguleika á þátttöku í næstu hátíð og nýta sér þennan vettvang til að kynna eigin verkefni og efla tengslanet sitt.

Frekari upplýsingar

Upplýsingar um hátíðina og næstu viðburði má finna á www.tonik.fo.
SSNE vonast til að sjá fleiri íslensk fyrirtæki og frumkvöðla taka þátt á næsta ári og leggja sitt af mörkum til alþjóðlegrar nýsköpunar og skapandi hugsunar. Frekari upplýsingar má finna hjá verkefnastjórum nýsköpunar Önnu Lind og Díönu.