Minjastofnun auglýsir eftir umsóknum um styrki úr fornminjasjóði
Skrifað
10.12.2021
Flokkur:
Fréttir
Ljósmynd: Markaðsstofa Norðurlands
Minjastofnun auglýsir eftir umsóknum um styrki úr fornminjasjóði
Hlutverk fornminjasjóðs er stuðla að varðveislu og rannsóknum á fornminjum. Sjóðurinn veitir styrki til rannsókna á fornminjum, þar á meðal til fornleifaskráningar, miðlunar upplýsinga um þær og til varðveislu og viðhalds á fornminjum. Sjóðnum er einnig heimilt að veita styrki til viðhalds annarra menningarminja sem hafa menningarsögulegt, vísindalegt eða listrænt gildi, t.d. minja sem njóta ekki friðunar á grundvelli aldurs en teljast hafa varðveislugildi, svo sem skipa, báta og annarra samgöngutækja, sbr. reglur um úthlutun úr fornminjasjóði nr. 578/2014 .
Úthlutað er styrkjum til eftirfarandi verkefna samkvæmt vinnureglum fornminjasjóðs:
- Fornleifarannsókna (fornleifauppgraftar og fornleifaskráningar)
- Miðlunar upplýsinga um fornminjar
- Varðveislu og viðhalds fornminja, þ.e. fornleifa og forngripa
- Rannsókna á forngripum
Hér má finna rafrænt eyðublað fyrir umsóknir í fornminjasjóð.
Umsækjandi þarf að skrá sig inn með rafrænum skilríkjum.
Hægt er að skoða innsendar umsóknir gegnum síðuna island.is
Með umsóknum þarf að fylgja ítarleg kostnaðaráætlun sem fylla skal út í samræmt excel-skjal sem finna má hér. Vistið skjalið á tölvu, fyllið út og festið við umsóknina sem fylgiskjal.
Athugið að fylla út viðeigandi reiti á skilmerkilegan hátt, því skortur á upplýsingum getur haft áhrif á mat umsóknar.
Umsóknarfrestur er til og með 10. janúar 2022.
Sé nánari upplýsinga óskað skal senda póst á netfangið fornminjasjodur@minjastofnun.is