Í dag birtist frétt á mbl.is þar sem lesa má um fyrirhugaða opnun starfstöðvar Ríkisendurskoðunar á Akureyri.  Þessu fagnar SSNE en sterkur samhljómur er með þessum fréttum og þeim sjónarmiðum sem fram komu á nýafstöðnu málþingi um störf óháð staðsetningu.  Ekki er um flutning allrar stofnunarinnar að ræða heldur afmörkuð verkefni eða svið innan hennar.  Verk­efni skrif­stof­unn­ar verða að ann­ast fjár­hag­send­ur­skoðun á A-stofn­un­um, svo sem heilsu­gæslu, mennta­stofn­un­um, lög­reglu, sýslu­mönn­um og ýms­um stofn­un­um á Norður- og Aust­ur­landi og ann­ast stjórn­sýslu­út­tekt­ir og liðsinna við eft­ir­lit með rík­is­tekj­um.  Þá eru jafnframt áform um að færa ákveðin verkefni fyrir landið allt, sem eingöngu eru unnin rafrænt, til Akureyrar.  

Það er gamaldags hugsun að allt þurfi að vera í Reykjavík eins og fram kom í viðtali mbl.is við Ásmund Einar Daðason, félagsmálaráðherra í kjölfar frétta af flutningi brunavarnasviðs Húsnæðis- og mannvirkjastofnunar til Sauðárkróks.  Þar segir félagsmálaráðherra að það sé yfirlýst stefna stjórnvalda að þegar ný svið verði til, þá séu þau staðsett úti á landi.  

Ekki er langt síðan við birtum frétt um opnun starfstöðvar Persónuverndar á Húsavík sem hefur starfsemi sína í mars.  Þetta eru niðurstöður samráðs og samstarfs Persónuverndar og Sýslumannsins á Norðurlandi eystra og er dæmi um hvernig sérhæfð, miðlæg stofnun starfar með staðbundinni ríkisstofnun í héraði eins og fram kemur í frétt Vikublaðsins fyrr í febrúar.   Betur má ef duga skal en svona áföngum ber að fagna.  

Frétt mbl.is af opnun starfstöðvar Ríkisendurskoðunar á Akureyri. 
Frétt Vikublaðsins af nýrri starfstöð Persónuverndar á Húsavík. 
Frétt mbl.is af flutningi brunavarnasviðs Húsnæðis- og mannvirkjastofnunar til Sauðárkróks.