Fiðringur, hæfileikakeppni unglinga á Norðurlandi eystra
Markmið verkefnisins er að stuðla að listsköpun ungmenna og hvetja þau til að semja, æfa og flytja sína eigin frumsköpun.
Að leiðbeina ungmennum í samvinnu, lýðræðislegri hugsun og ákvarðanatöku þegar kemur að því að velja milli hugmynda og gera þær að veruleika.
Að skapa vettvang fyrir ungmenni af öllu svæðinu til að halda uppskeruhátíð og flytja verk sín á stóru sviði með öllum leikhústöfrunum.
Fyrirmyndir Fiðrings eru hinn árlegi Skrekkur í Reykjavík og hinn tveggja ára gamli Skjálfti á Suðurlandi.
Í hverjum skóla sem tekur þátt er Fiðringur kynntur, þátttakendur bjóða sig fram og vinna að sinni listsköpun með leiðbeinanda fram að undankeppni/lokakvöldinu. Leiðbeinendur fá námskeið áður en hafist er handa svo allir séu á sömu blaðsíðu. Aðalmálið er að hugmyndir nemenda séu útgangspunktur. Hvað liggur þeim á hjarta? Að rödd framtíðarinnar fái að ávarpa samtímann.
Verkefnastjóri Fiðrings er María Pálsdóttir.
Staða á verkefninu: Í undirbúningi.
Upphæð 2026: 8.350.000 kr.
Upphæð 2025: 8.700.000 kr.
Upphæð 2024: 7.900.000 kr.
Upphæð 2023: 5.000.000 kr.
Upphæð 2022: 3.000.000 kr.
Sjá frétt frá undirritun þriggja ára samnings við MAK um Fiðring
Samtök sveitarfélaga og atvinnuþróunar gerðu í dag samning við Menningarfélag Akureyrar um tvö verkefni, Upptakt og Fiðring. Um er að ræða áhersluverkefni Sóknaráætlunar sem stjórn SSNE hefur valið að styrkja til þriggja ára. Bæði þessi verkefni styðja vel við barnamenningu sem er ein af áherslum Sóknaráætlunar Norðurlands eystra, auk þess að vera áhersla menningar- og viðskiptaráðherra sem stutt hefur dyggilega við sóknaráætlanir landshlutanna um árabil.
Fiðringur er hæfileikakeppni ungmenna á Norðurlandi eystra sem hefur það að markmiði að stuðla að listsköpun ungmenna og hvetja þau til að semja, æfa og flytja sína eigin frumsköpun. Með Fiðringi er skapaður vettvangur fyrir ungmenni af öllu svæðinu til að halda uppskeruhátíð og flytja verk sín á sviði með öllum leikhústöfrunum.
Upptaktur, tónsköpunarverðlaun barna og ungmenna á Norðurlandi eystra stuðlar að tónsköpun ungs fólks og hvetur þau til frumsköpunar. Ungmennin fá aðstoð við að fullvinna hugmyndir sínar í vinnusmiðjum með atvinnu tónlistarfólki og upplifa eigin tónlist í flutningi atvinnuhljóðfæraleikara. Þátttakendur eignast svo hágæða upptökur af eigin tónsmíðum í flutningi fagfólks.
„Það skiptir bæði þessi verkefni afar miklu máli að hafa vissu fyrir því að fjármögnun til þriggja ára liggi fyrir og mun vonandi gera þeim kleift að blómstra enn frekar og skapa sér vettvang til framtíðar. Að auki verður upplifun ungmennanna einnig betri þar sem fókusinn mun geta farið frá því að hafa áhyggjur af fjármögnun hvers árs í að vinna enn meira með verkefnin sjálf. Með þessum samningi verður barnamenningu í landshlutanum gert enn hærra undir höfði og við fögnum því gríðarlega,” segir Kristín Sóley Björnsdóttir viðburðastjóri Menningarfélags Akureyrar og verkefnastjóri Upptaktsins og tekur María Pálsdóttir verkefnastjóri Fiðrings heilshugar undir þessi orð.
Sóknaráætlanir landshlutanna eru fjármagnaðar af menningar- og viðskiptaráðuneytinu og innviðaráðuneytinu. Fyrir áhugasama má kynna sér Sóknaráætlun Norðurlands eystra og verkefni hennar á heimasíðu SSNE.