Innviðaráðherra hefur úthlutað 170 milljónum króna til fjórtán verkefna víðs vegar um landið til að efla viðkvæmar byggðir. Úthlutunin er sú hæsta sem veitt hefur verið úr aðgerð C.1 – Sértæk verkefni sóknaráætlunarsvæða – á gildistíma núverandi byggðaáætlunar.

Þrjú verkefni á Norðurlandi eystra hlutu styrk, alls 38 milljónum króna. Verkefnin snúa öll að því að efla innviði, styðja við atvinnuskapandi þróun og styrkja byggðafestu á norðausturhorninu.

Lýsistankar á Raufarhöfn – 8 m.kr.
Veittur áframhaldandi styrk til að ljúka viðgerðum á þaki og koma upp merkingum við Lýsistankana á Raufarhöfn. Þetta eru mikilvæg skref til að gera mannvirkið fullnægjandi, öruggt og tilbúið til notkunar í menningar-, lista- og ferðaþjónustu.

Ráðhúsið á Raufarhöfn – atvinnu- og samfélagssetur – 10 m.kr.
Veittur er framhaldsstyrkur til að ljúka endurbótum á Ráðhúsinu og skapa þar aðstöðu fyrir fjölbreyttari atvinnustarfsemi. Markmiðið er að laða að frumkvöðla og nemendur, efla menntunarstig og styðja við samfélagið með öflugum samveru- og vinnurýmum.

Vaxtarplan fyrir Norðausturhornið – innviðir og aukin verðmætasköpun – 20 m.kr.
Verkefnið miðar að því að greina helstu tækifæri á norðausturhorninu, móta framtíðarsýn um innviðauppbyggingu og skapa forsendur fyrir nýja verðmætasköpun. Verkefnið fylgir eftir nýlegu samkomulagi sem tryggir aukið afhendingaröryggi raforku á svæðinu – lykilatriði fyrir framtíðaruppbyggingu atvinnulífs.

Nánari upplýsingar um áherslur stjórnvalda vegna sértækra verkefna sóknaráætlanasvæða er að finna í C.1. lið Stjórnarráðið | C.01. Sértæk verkefni sóknaráætlanasvæða